【明報專訊】選委界別立法會議員陳紹雄上個月因急病入院，休養咗一段時間，噚日終於返立法會開工。佢噚日下晝喺會議室外同Emily講，唔方便透露具體病情，但話復元情况唔錯，諮詢醫生後可以重投議會工作，多謝大家關心。至於會唔會調整工作量，佢引述醫生話議會工作屬「案頭工作」，「𠵱家基本上可以返番工，基本上無咩限制」，希望繼續進展良好，會按照工作要求「調一調啲先後緩急嘅嘢」。佢又寄語大家「關照住自己身體」，無嘢重要得過健康。