【明報專訊】上周五起一連4日嘅西九咖啡節喺西九文化區藝術公園舉行，噚日遇上黃雨，大草坪變成一片泥漿地，部分檔主因水浸無法營業，入場者亦慘變落湯雞，唔少人「泥足深陷」。主辦單位宣布，噚日入場嘅人憑印有日期嘅手帶或當日場內消費收據，可以喺今日免費入場。唔少咖啡迷噚日對鞋變到烏卒卒，主辦單位聯絡洗衣店提供洗鞋服務，首100個聯絡洗衣店嘅人可免費洗鞋，其餘人就有八折優惠。