【明報專訊】宏福苑住戶喺本月20號至下月4號可以重返家園執拾，現場有大量著住唔同制服嘅工作人員支援。公務員事務局長楊何蓓茵話，政府啟動「全政府動員」機制，調派唔同部門同事去幫手，上樓嘅人有啲係圖書館館長，又有漁業督察、工程師，佢讚揚同事全力以赴為居民解決問題，話試過有一戶居民因為保險箱太重未能搬走，但又搵唔到鎖匙開啟，陪伴上樓嘅同事即場跨部門協作，終於喺短時間搵方法協助打開保險箱，等居民可以取回重要物品。