【明報專訊】呢兩日天氣唔係好穩定，噚日有黃雨。民建聯立法會議員葉傲冬擇日噚日為馬鞍山地區辦事處搞開幕禮，佢話「古語有云貴人出門招風雨」，話議辦開幕禮有唔少嘉賓來臨，開始時有微雨，好彩算天公作美，典禮開始後雨過天青。佢又形容，咁樣就似民建聯新界東南團隊，無論面對風雲變幻都要做好社區工作。葉傲冬曾喺九龍區工作，立法會選舉空降新界，佢噚日就話會繼續努力優化馬鞍山社區建設，喺立法會亦會密切監察T4主幹道擴建工程。