【明報專訊】實政圓桌召集人田北辰噚日喺社交媒體炮轟機管局，事緣佢帶孫仔去越南峴港學打高球，前晚（3日）搭廉航返港，遇上暴雨。佢話航空公司無用登機橋，要喺停機坪落機，抱怨乘客要喺機上等待，又要冒大雨用樓梯車落機，又指接駁巴士泊得遠，搞到乘客全部變「落湯雞」、好狼狽。田二少問香港用咗成千億搞三跑，但點解唔好似外地咁，改用有瓦遮頂嘅樓梯車，話服務水平跟唔上就會變成國際笑話。