喺朋友堆中，我一向係負能量之霸。

因為咩？

因為不停喺愛情路上仆晒街日怨夜喊囉。

但今時今日，我變咗佢地嘅正能量之星。

因為咩？

因為佢地見識到一個家無恆產嘅人原來都可以生活愉快囉。

我冇家底冇車冇樓冇股票冇儲蓄冇乜點交過稅冇屬於自己嘅地址，連做緊嘅果份工，喺朋友眼中，都係冇錢冇前途嘅。

畢業之後，各奔前程，朋友向中產路進發，我繼續喺無產路散步。

佢地真係為我擔心咗好多年。

最近，有幾個朋友終於出聲，覺得為我擔心係多餘嘅。

真係㗎，做人有好多種玩法，總之我夠錢搭的士去中環，同你去fuel飲咖啡咪得囉。