到底，要減幾多次肥先可以修成正果呢？

唔通，要減到死嗰日？

死咗之後，我嘅肉身經過火燒，會唔會有舍利子出現？

全部係生前食嘅減肥藥精鍊出嚟？

女仔要減肥，真係好麻煩。

跑步怕腳粗，游水怕變平胸，做gym又驚成個人橫咗。

諗來諗去，食藥做機好似好懶，但反而係最safe嘅。

減肥難，唔減咁又點呢？

我只係覺得，一個肥嘅女仔，佢條路，往往比其他女仔難行得多。

女仔一肥，就係「豬扒」。

即使你個樣其實幾靚，人聰明心地又好，放心，冇人會睇得到，你依然係一件「豬扒」。

上個禮拜，阿媽語重心長咁問我：「你就快三十歲啦，想玩到幾時呀？」

當然，佢指嘅係 —— 我幾時會選擇安定落嚟，結次婚生個孫俾佢玩。

但我諗起嘅係，就快三十歲啦，幾時可以100％修身成功，唔好再去到90％就停低，然後退步返去80％。

係時候將肥咗嘅幾磅肉減走，搵番嗰個好有毅力，減到日日胃抽筋都唔肯停嘅自己。

十個女仔，九個都話要減肥，為咗男人又好，為咗自己都好，建立一個目標，推動自己進步向前，始終係一件好事嚟嘅。

雖然，我阿媽仍然係未望到家鄉，未見到自己個女結婚生仔，冇法啦。