Lady First 專欄（58）
今晚，我想將呢節《飛女正傳》既時間，送俾一個男人—— Mr. A。
同佢認識咗好幾年，後來漸漸再冇聯絡。
早排，偶然又再遇到佢。
初初認識Mr. A既時候，我冇愛上佢，但的確曾經對佢有過憧憬。
不過，最後我地只係做咗朋友。
我記得，最唔開心最失意既果年生日，就係佢陪我度過既，但我一直冇正式多謝佢，只係透過一篇佢唔會有咩機會睇到既文章去答謝。
內容係咁既：
------------------------------------------------------------------------
Dear Mr. A,
多謝你陪我度過今年既生日。
當朋友問我會同邊個慶祝生日時，佢地聽到你個名字都好驚訝──「吓？呢個人仲o係度？」。
係呀，你仲o係度，遙遠但係常在。
呢幾年o黎，每次見面你都會俾個新理由我，解釋點解當初鍾意我但係又冇一齊。
每次我都笑住咁話，總有一天你會後悔錯過咗我。
其實，我明o架，真係明。
你對我既鍾意，就好似你鍾意食法國菜鍾意養貓仔咁囉。
點都好，多謝你陪我晚飯，陪我散步，同埋唱生日歌俾我聽。
-------------------------------------------------------------------- （內文）