袁彌明 要日賣千杯奶茶

近年香港啲舖租不斷上升，商店賺賺埋埋畀咗一大截租金，好似幫業主打工。大集團還好，小本經營就真係好辛苦，但雖然係咁，仲有唔少人想過吓老闆癮。早排先開咗間賣美容產品店舖嘅 袁彌明 ，下月又有新搞作，計劃殺入尖沙嘴加連威老道嘅商場gi，開珍珠奶茶舖賣teapresso。

袁彌明 今次係跟個小學同學夾份，合資四十萬，舖名已經諗好，叫做Kami。有咩令佢突然進軍埋飲食界呢，原來佢都好鍾意飲珍珠奶茶，但就嫌好多店舖加咗奶精，影響健康， 袁彌明 一向挑剔，於是自己開舖，用整Espresso方法沖特濃奶茶，唔止用鮮茶葉沖、奶仲可以揀低脂。

間舖只有百二呎，每月租金要成三萬，而每杯奶茶預算賣廿二蚊，即係話未計人工、材料同雜費，每個月要賣到千四杯，即每日至少賣四十六杯先夠畀舖租。