近年阿姐阿哥阿叔阿嬸都幾乎人人一台單鏡反光機，加上不少手機拍攝功能已日益媲美一般數碼相機，我還以為卡片型 DC 仔市場理應可以收皮，誰不知專為 snap shot 而設的 DC 仔依然長賣長有，各大品牌的款式顏色功能換完季再換季，幾乎每個月都有新搞作。

老老實實，講多無謂，既然單鏡大機市場和 CAN 囊和叻 KON 兩位大哥距離有排都未拉得近， Samsung 便索性在轉款如換季的 DC 仔市場中瘋狂搶灘，就算不特別留意數碼相機市場的，都可能留意到 Samsung DC 仔近期幾乎隔個月就有新搞作，搵完余民樂代言又搵 Stephy 拍網上短片，力攻年輕人市場。

但反過來說，涼伯我雖然自問已算老餅，但除了單鏡大機外，我仍鍾情於可方便隨身「出鞘」的 DC 仔，說明 DC 仔並非只屬年輕人專有。 Samsung 最近推出的這部 ST550 ，雖然我每次拿出來的時候，我身邊的朋友第一個反應除了會 O 咀讚靚外，不少人又會說：「我個妹都買 o 左呀」、「等我都買番部俾我女友先」、「哎呀好 Cute 呀，我都要買 o 左部俾個 / 條女呀」，忽然間好像都一口咬定了這部是年輕雌性人類的專用機，但我一於少理，心裡暗罵三字經之餘，便繼續向正 O 咀讚嘆的他們 snap snap snap 。

這部 ST550 的最大賣點，不是和市場上其他品牌鬥 Configuration ，而是鬥創意。它全球首創，有後又有前的 雙芒顯示，除了方便愛玩單手自拍的年輕人，一邊自拍一邊在鏡頭的旁邊看到自己的貓樣外，當啟用時間掣自拍時，這在鏡頭旁邊的1.5吋LCD熒幕，更會顯示 3-2-1 的倒數，包你唔會等等下等到眨咗 眼都唔知，另外，更有一專拍攝小朋友時預設的卡通動畫，唔駛你大人大姐仲要出洋相扮小丑逗小朋友笑。

多得 Samsung ，今次又給我一個試機 機會 ，仲要夾啱 我放假到馬來西亞旅行前俾我借機一用，等我今次旅行可以影多幾張靚相，我會稍後和大家分享分享，但你放心，為免大家作嘔，我一定一定唔會將我的 Cutie 自拍照公諸於世 ( 最多自己匿埋影咁話 ) 。