【明報專訊】海洋公園水上樂園今個暑假會以1980年代做主題，由聽日至8月31日，除8月22日外，每逢周六周日夜晚都有「CANTON BEATS」活動，有DJ喺現場打碟，重新演繹經典廣東歌，仲會有池邊酒吧。一家大細去玩都有其他活動，例如大型遊戲區有4款遊戲，包括層層疊、西洋棋、四子棋同大型保齡球，而造浪池除咗有水上排球同籃球外，今年新增「水上滾筒機」（上圖），逢周六周日亦各有兩場衝浪示範（下圖）。