【明報專訊】香港駐曼谷經貿辦喺當地搞緊「香港有約」展覽，擺放多個有香港特色嘅攤位，除咗行埋去「打卡」影相，有啲仲可以落手「實戰」，就好似香港冬天時獨有嘅栗子檔（圖），大家喺香港都未必有機會拎起鑊鏟炒，而攤檔後面嘅塗鴉亦夠晒真實，現場仲有印章檔、籤筒、電車等畀參觀者試玩。原來今次展覽嘅裝置由香港同泰國嘅藝術家同學生一齊創作，駐曼谷經貿辦處長林俊華喺開幕禮提到，今次展覽展示香港創意、多元文化、中西薈萃嘅獨特魅力，透過兩地合作設計，仲體現到兩地嘅關係緊密。