【明報專訊】立法會噚日開大會，第一條口頭質詢由經民聯林偉全提出，講到旅客嚟香港參與盛事後去其他地方過夜。旅遊界「新丁」議員江旻憓（白衣者）搶到發言機會，又不時寫「筆記」。例如民建聯陳勇喺補充質詢關注同大灣區城市加強旅遊方面嘅合作，文體旅局長羅淑佩（前）回覆時，江旻憓亦喺席間疾寫；當時未到佢發言，無得企起身，只能伸長手臂喺升高咗嘅桌板寫字。大約10分鐘後到佢補充質詢，就問到近年吸引穆斯林旅客嘅成效、政府點協助旅遊業把握商機，羅淑佩回覆，今年頭5個月中東旅客按年增加13%，香港亦獲評「穆斯林友善旅遊目的地」。