【明報專訊】香港呢兩日持續極端酷熱，噚日日頭氣溫更破咗百幾年紀錄，好多人就關心一向盡量唔開冷氣嘅天文台前台長林超英頂唔頂得順。佢噚日傍晚同Emily講未去到頂唔順要開冷氣，「仲有啲距離」。林超英噚日凌晨已喺facebook發帖，話今年暫時未開冷氣，講明「如果我開冷氣，我會通知大家，請不必來問」。到下晝佢再發文評論氣溫破紀錄同「工作暑熱警告」，好多人乘機留言問佢開冷氣未，有關心佢嘅網民建議佢不如破例開一個鐘。不過，佢回覆Emily查問時就話仲頂得順，「未開，未開！」