夫家出首期買北都新樓準新娘過海返工嫌遠兼怕住近奶奶網民教「一絕招」反客為主

結婚買樓若遇上帶條件的資助，隨時引爆婆媳大戰。一名準新娘近日發文，指夫家主動出首期買北部都會區新樓，她卻因過海返工嫌遠、兼怕住近老爺奶奶而陷入兩難。

不少網民警告這筆首期是「隱形炸彈」，但亦有人破格教路「一絕招」，傳授她如何精明地反客為主，輕鬆化解這場首期風波。詳情見下圖及下文：

夫家出首期買北都新樓準新娘過海返工嫌遠兼怕住近奶奶網民務實教路「一絕招」反客為主逐張睇↓↓↓↓

樓主昨天（14日）在社交平台 Threads發帖，分享自己即將步入婚姻殿堂的煩惱：「初級大人準備升呢做中級大人啦🙋‍♀️下年會同男朋友結婚，男朋友屋企人住（上水）河上鄉，佢屋企人話可以畀首期買新嗰個樓盤，但就會好近6299（老爺奶奶）…😅」

除了擔心與老爺奶奶住得太近外，跨區上班也是樓主的一大顧慮。她表示：「我返工返灣仔，但覺得好遠咁，求意見。」

有網民指出樓主的真正糾結：「樓主直接啲啦，你個標題應該改做：要層樓定要二人世界」。有網民更打趣質疑，這該不會是區內的「樓盤廣告？」

對此，樓主隨後親自留言澄清，指自己並非嫌棄男方家人，只是對新界北不熟悉：「我無話99（奶奶）唔好…只係呢…唔知點講好… 其實已經搵咗 agent（經紀）搞抽籤，只係我唔熟北區啫。」

對於樓主嫌遠的顧慮，不少北區街坊及熟悉該區交通發展的網民為地區平反，指出日後北都區內的交通基建將大為改善。

有街坊直言：「北區人路過，最怕人哋未去過就覺得遠😂 你知唔知上水坐東鐵出金鐘先係45分鐘？你知唔知古洞站下年就通車？」、「你入伙時個站已經開咗，直坐去金鐘，但唔知有冇位坐」、「遲下有地鐵，好快見曙光」、「我住粉嶺，通咗金鐘之後已經好方便」。

事實上，港鐵正在東鐵綫落馬洲支綫上興建古洞站，而古洞站設於落馬洲站及上水站之間，位處現時馬草壟路與河上鄉路之交界，即古洞北新發展區的市中心。東鐵綫古洞站目標於2027年即明年完成；待港鐵北環綫古洞站於未來落成後，乘客更還可在古洞站轉乘東鐵綫及北環綫。

雖然交通問題有望解決，但大批心水清的網民都將焦點放在「老爺奶奶出首期」這個潛在炸彈上，強烈建議樓主三思，以免日後在家中失去話語權。

有網民直言：「意見就係邊個畀錢邊個話事，如果係你阿爸阿媽畀首期、你住喺灣仔公司隔離都得。男家畀錢就男家話事、嫁得你都冇得揀」。

有網民警告：「千祈唔好，一定係用兩公婆自己錢自己買樓，如果唔係你成世只會有低人一等嘅感覺，畀夫家食住你一世。」、「有時啲著數真係唔拎得！第時6299裝修又管，得閒就上嚟指手畫腳」。

有「高級大人」更以過來人身分大拋金句，勸勉樓主要保持經濟獨立：「未來老爺奶奶話幫你畀錢 = 間屋佢哋都有話事權，你到時就大鑊😂 對你呢個屋企指指點點，可以自出自入，你反抗畀說話你聽，你就會變得好卑微。（高級大人路過話你知😏 做女人最緊要自己有錢，有揸拿，咁先有地位，唔會畀人蝦）」

在反對聲中，網民熱心傳授應對絕招。主張靠自己的網民強烈建議：「自己同男朋友畀錢買啦，如果要佢屋企人幫手，寧願唔好買」、「有能力就自己畀錢啦，冇能力就唔好結婚住」、「建議兩公婆自己錢置業」。

也有人提出折衷方案：「1. 叫自己父母出同金額首期，一齊揀一齊落名，大家咁高咁大；或 2. 拒絕兩邊父母幫忙，兩公婆靠自己買，自己揀自己話事。」

至於認為「不拿白不拿」的網民，則教路首要條件是絕對不能交出門匙。但網民亦提醒這難度極高：「佢哋畀首期，你就預咗佢哋會有鎖匙，隨時上嚟你哋屋企，你冇得say no（說不）」、「 記得唔好交鎖匙畀兩老 ，要同老公有共識。得閒去食個晚飯就夠。」

更有網民直言：「大部分人講就兇狠，講到自己幾咁清高都onＸＸ，樓主屋企／自己真係咁有能力就唔會上嚟問啦。當你首期兩球嘢（200萬），最緊要層樓佢哋無名，你哋供多幾年按返層樓再去投資錢滾錢，呢幾年乜X嘢裝修鎖匙話事權就是X但啦，到時搵到錢叫返兩老過海同你XX都仲得。」

此外，也有人提醒樓主要考慮未來的生育計劃：「有無諗住生小朋友？如果生就要諗有無需要兩老幫手照顧，請唔請工人？」

看著留言區一面倒防範「老爺奶奶」的言論，有身為母親的網民感到十分無奈，分享了自己的初心：

「死火，咁多人唔鍾意老爺奶奶出錢買樓。我儲緊錢畀個仔第時結婚買樓，我都有諗到時畀嚿錢佢落佢名買樓，定係我買，畀佢兩公婆住，唔住就算。但我作為阿媽心態，只係唔想個仔第時咁辛苦供樓，做阿媽盡幫。」

對此，有網民溫暖地回覆這位慈母：「你個仔命好啊，你咪儲住先，到時佢有需要可以幫，但唔需要咪自己用。」

資料來源：Threads