【明報專訊】港鐵網絡不斷擴展，亦記錄每一代人嘅集體回憶，例如1990年代觀塘線藍田嘅下一站就係鰂魚涌。港鐵噚日分享咗第二條航拍片，帶市民遊覽舊觀塘線過海。片段由藍田站出發，進入1989至2002年提供載客服務嘅舊觀塘線路段，途中經過茶果嶺露天段，重遇東隧收費廣場前嘅景致，再穿越全港第二條過海路線——東區海底隧道鐵路段，最後到達鰂魚涌。