【明報專訊】18區各獲政府額外撥款百萬元搞「打卡位」裝置，其中九龍城區就喺啟德車站廣場設打卡區域，Emily留意到呢個廣場原來仲有一個街坊認可嘅「打卡點」，就係公園入面嘅「水景設施」，因為無遮無掩可以影到水中倒影，街坊稱之為「啟德之鏡」。不過呢個「自然形成」嘅打卡位，最近喺側邊擺咗花盆同圍欄遮擋，令街坊好不滿。據區議員話，當局可能因為啟德體育園就快開，以人流安全為由圍住個水池。