【明報專訊】中文大學校長段崇智年初提出請辭，明年1月卸任。佢近日撰文寫下臨別感言，感謝校內同事及各界支持，文中唯一點名多謝嘅，就係中大校友、財爺陳茂波，感謝佢多年嚟經常出席中大活動，關注中大發展，令中大同仁都深感榮幸。本月初中大校友會為佢搞嘅歡送晚宴，有唔同年代校友出席，睇番當晚嘅相，陳茂波都有出席，段校長就話令佢驚喜萬分，亦為嗰晚更添意義。