【明報專訊】嘉道理農場暨植物園有隻非洲灰鸚鵡，除咗羽毛係灰白色，就連眼珠都係，唔講仲以為係呢個品種嘅特徵，實情係患咗白內障。呢隻「視障鸚鵡」叫彤彤，今年27歲，𠵱家住喺嘉道理農場嘅鸚鵡護理中心。中心噚日喺社交平台話，正為彤彤籌備白內障手術，預計手術後彤彤可以有多10年命，呼籲市民捐款支持，令彤彤「重見光明」。