【明報專訊】文體旅局長羅淑佩近年官運亨通，佢噚日出席商台65周年午宴時，被陳志雲等主持問到升官心得同最敬重嘅上司係邊位。佢最初笑笑口話啲問題「伏」，但亦分享咗一段往事，就係佢2014年做旅遊事務副專員時要上立法會帳委會，「盛事基金出咗少少事……咁當年嘅常任秘書長係畀到好大嘅鼓勵我，話你𠵱家係好難面對，不過你面對咗之後，將來你就會覺得好輕省㗎喇！」佢講嘅嗰位上司就係時任商經局常秘黃灝玄。