澳洲經濟麻麻哋，其實大家都心中有數。 不過啱啱澳洲儲備銀行決定維持利率不變，真係令唔少人跌咗眼鏡。 咁喺招聘市場方面，我哋又可以喺邊度睇出經濟好唔好， 有冇啲咩跡象可以留意？
首先當然係睇招聘廣告數字有冇升幅。根據澳洲統計局嘅最新數據， 私人市場新增職位只係上升咗0.4%，而公營市場就升咗2%， 基本上係靠政府部門頂住個市。 呢個情況其實已經好明顯話畀我哋知， 私人企業對未來經濟前景冇乜信心，就業市場非常之唔理想。
我最近同幾間獵頭公司傾過，佢哋話依家接job真係唔容易， 因為客戶都紛紛縮緊人手預算。冇裁員已經算好， 仲邊有budget再請人？我自己公司都唔例外， 過去幾個月已經刪減咗一啲冇咁急切需要嘅職位。 呢啲決定當然唔開心，但係大家都明，做生意唔係講感情， 唔炒你就係攬炒。
當然唔係所有崗位都唔請人，有啲工種仍然好搵唔到人。 例如我哋而家喺西澳請緊tradie（技工）， 本身一向都係幾難請嘅職位。過往景氣好嘅時候，放喺求職網站， 一個月收到二、三十份履歷都算唔錯，仲要質素參差。 但今次招聘放咗上去48小時之內，竟然已經收到過百份申請， 到個weekend過後，接近300份，真係令人相當驚訝。 而且當中仲有唔少係來自原本喺礦場（Mine site）工作嘅人，反映而家部份礦區可能已經開始縮水或停產， 導致大量熟手工人流入市場搵工。
我亦試過喺大學招募intern，反應一樣好得出奇。 反映出而家就算係年輕人都開始意識到市道唔好， 搵到實習機會都唔容易，自然積極主動啲。
整體嚟講，無論係前線技術工人定係職場新鮮人， 佢哋嘅反應都好清楚反映咗：澳洲而家個就業市場， 確實比表面睇落更加緊張，亦係另一種側面印證，經濟未見起色， 甚至可能已經開始步入寒冬。
作者： Sydney HR 的日與夜
關於作者：作者為一企業人事部職員，同時為合資格Life Coach，國際九型人格師、MBTI及DISC Advance持牌培訓師。最鍾意玩玩具同寫下嘢。現我城隕落，無比哀嘆，盼一盡綿力，將文化保存，以文會友，抒發一下。這篇文章，歡迎轉載。
